വൈരുദ്ധ്യം

ഏറ്റവും അസഹ്യമായ
അസത്ത് വാക്കേതെന്ന ചോദ്യത്തിന്‌
തെണ്ടി എന്ന് മന്ത്രിയും
മന്ത്രി എന്ന് തെണ്ടിയും
മറുപടി പറയുന്നു.
ദൈവം എന്ന് ചെകുത്താനും
ചെകുത്താൻ എന്ന് മതവും
മതം എന്ന് ദൈവവും
മറുപടി പറയുന്നു.
ഒരേ ചോദ്യത്തിന്‌, പലരും
പല ഉത്തരങ്ങളെഴുതുന്നതിനെയാണ്‌
ലോകമെന്നു വിളിക്കുന്നതെന്നറിയാതെ
കുട്ടികൾക്ക്,
വലിയ തെറ്റും തോൽവിയും വിധിക്കപ്പെടുന്നു.
അവർ പിന്നെ
സാറ ടീച്ചറിന്റെ തെറ്റും,
അഹമ്മദ് മാഷിന്റെ ശരിയും,
നമ്പൂതിരി മാഷിന്റെ വമ്പും പഠിച്ച്
ജയിച്ച് ജയിച്ച്
തോറ്റ് തോറ്റ്
മന്ത്രിയും തെണ്ടിയും
ദൈവവും ചെകുത്താനും
മതവും മധ്യസ്ഥനുമാകുന്നു.