ബന്ധനം

എപ്പൊഴും
ചീറിപ്പാഞ്ഞുവരുന്ന അമ്പിന്‌
ജാഗരൂകമായിരിക്കണമെന്നുപദേശിച്ച
തള്ളക്കിളി,
എന്തുകൊണ്ട്‌ നമുക്കൊരായുധം
കരുതിക്കൂടാ.... എന്ന മറുചോദ്യത്തിൽ
മൗനിയായിരിക്കെ
കുഞ്ഞിക്കിളി
ചെറു ചിറകുകൾ വിടർത്തി
വിശാലമായ നീലാകാശത്തിന്റെ
അനന്തത്തയിലൂടെ
ചോരമണക്കുന്ന ചരിത്രത്തിലേക്ക്‌
പറന്നു പോയി
* * *
എങ്ങനെ എതിരാളിക്കുമേൽ
ചാടിവീഴണമെന്നു പഠിപ്പിക്കവെ
എന്തുകൊണ്ട്‌ നമുക്കവരെ നോക്കി
പുഞ്ചിരിച്ചുകൂടാ......എന്നു ചോദിച്ച
കുഞ്ഞുസിംഹം
അമ്മയുടെ വന്യമായ
മുരൾച്ചകൾ താണ്ടി
കാടിന്റെ കാടത്തത്തിനു നടുവിലൂടെ
പുഞ്ചിരിക്കുന്ന ചരിത്രത്തിലേക്ക്‌
നടന്നു നീങ്ങി
* * *
ഇപ്പൊഴും ഞാൻ
വൈരുദ്ധ്യങ്ങളുടെ
പഞ്ചതന്ത്രം കഥകളിൽ കുരുങ്ങി
എങ്ങനെ രക്ഷപ്പെടണമെന്നറിയാതെ
ബന്ധനത്തിന്റെ...................ചങ്ങലയുടെ.........
കാഠിന്യത്തെ
വെറുതെ..................
നക്കിത്തുടച്ചുകൊണ്ടിരിക്കുകയാണ്‌